By 
SundaNews (16/12/2024). Musyawarah Ikasadaya Fakultas Ilmu Budaya Universitas Padjadjaran (FIB Unpad) anu diayakeun dina Minggu, 8 Désémber 2024, di Bale Rumawat Kampus Unpad Dipatiukur, Bandung, ngahasilkeun kaputusan strategis pikeun komunitas FIB.
Dina musyawarah ieu, anu dihadiran ku perwakilan dékanat, para ketua program studi, alumni ti sagala jurusan, ogé BEM FIB, sapuk yén Reuni Akbar sareng Musyawarah Besar (Mubes) IKA Sadaya bakal dilaksanakeun dina 15 Pébruari 2025 di Kampus FIB Unpad, Jatinangor.
Acara ieu diharepkeun jadi ajang silaturahmi akbar pikeun alumni ti sagala angkatan sakaligus forum diskusi pikeun ngawangun kolaborasi strategis dina ngamajukeun Fakultas Ilmu Budaya, alumni, sareng mahasiswa.
Dina sambutanna, Wakil Dékan I FIB Unpad, Dr. Lina Meilinawati Rahayu, SS., M.Hum, negeskeun pentingna peran alumni dina ngarojong pangembangan fakultas, utamina pikeun mahasiswa anu keur nyiapkeun karirna. Lina ngawincik aya tilu program utama anu diharepkeun bisa diwujudkeun ngaliwatan kolaborasi sareng alumni.
Kahiji, program magang mahasiswa di tempat gawe alumni, salaku usahamere pangalaman langsung pikeun mahasiswa dina dunya profésional. Kadu, panalungtikan di tempat gawe alumni, tempat mahasiswa atawa dosén tiasa ngembangkeun kajian ilmiah anu relevan jeung kabutuhan industri jeung dunya pagaewan. Katilu, program alumni ngajar, tempat alumni ngabagi pangalaman jeung wawasan profésionalna pikeun nambah élmu mahasiswa.
“Ku kolaborasi anu raket, Fakultas Ilmu Budaya tiasa janten ékosistem akademik anu henteu ngan ukur unggul dina pangajaran, tapi ogé kompetitip dina nyiapkeun mahasiswa pikeun mangsa ka payun,” saur Dr. Lina.
Harepan tina Reuni Akbar
Yuszak M Yahya, care taker Ikasadaya, nekenkeun yén reuni akbar ieu lain ngan ukur riungan nostalgia, tapi ogé léngkah awal pikeun ngawangun program-program konkrit demi kamajuan Fakultas, alumni, sareng mahasiswa.
Panitia penyelenggara Reuni Akbar sareng Mubes IKA Sadaya ieu diwangun ku gabungan alumni, pihak dékanat, program studi, komunitas, BEM, mahasiswa, jeung pihak universitas.
Salain éta, pihak eksternal anu biga poténsi mere mangpaat strategis ogé dilibetkeun pikeun nyukseskeun reuni jeung mubes. Tujuan utamana nyaeta ngakrabkeun deui hubungan silaturahmi antara alumni ti sagala angkatan, ngembangkeun database alumni anu tiasa dimangpaatkeun pikeun sagala program strategis, ngawujudkeun inisiatif kolaboratif anu ngarojong mahasiswa, kaasup kasempetan magang, panalungtikan, jeung pangajaran langsung ti alumni, jeung ngarancang program-program anu ngarojong pangembangan karir alumni sareng masihan kontribusi nyata pikeun Fakultas Ilmu Budaya.
Sakumna alumni Fakultas Ilmu Budaya Universitas Padjadjaran doindang pikeun aktip ilubiung dina Reuni Akbar sareng Mubes ieu.Partisipasi aktip sareng dukungan ide-ide anyar ti alumni dipiharep pisan pikeun nguatkeun hasil anu dirumuskeun dina acara ieu, demi kamajuan FIB Unpad mangsa kahareup. Informasi salengkepna bisa ngontak Tim Panitia Seksi Média Publikasi Herry: 0812-2027-2210. (**)
Comments