Penerangan jalan umum (PJU) mangrupa fasilitas publik anu kacida pentingna pikeun ngarojong kasalametan jeung kanyamanan masarakat nalika ngalaksanakeun kagiatan dina waktu peuting.
Tapi, di sababaraha ruas jalan utama katut jalan lingkungan di Kota Bandung, masih kénéh loba kapanggih lampu PJU anu pareum jeung ruksak. Kaayaan jalan anu poék mongkléng ieu dikeluhkeun ku warga lantaran ngaganggu tetempoan nu ngagunakeun jalan.
Pareumna lampu jalan éta lain ngan saukur ngurangan kaéndahan kota, tapi ogé boga dampak langsung kana luhurna résiko kacilakaan lalu lintas. Nu mawa kandaraan jeung nu leumpang hésé ningali kaayaan jalan anu barolong atawa teu rata dina waktu peuting. Salian ti éta, kurangna cahaya lampu ogé bisa micu karawanan kajahatan jalanan anu ngancam kaamanan warga.
Masarakat tangtu hanjakal ningali launna penanganan fasilitas penerangan ieu, padahal warga geus rutin mayar Pajak Penerangan Jalan (PPJ) ngaliwatan tagihan listrik saban bulan. Kaayaan PJU anu diantepkeun pareum dina waktu anu lila nuduhkeun yén pangropéa infrastruktur publik acan lumangsung sacara optimal. Hak masarakat pikeun meunangkeun rasa aman di ruang publik ogé jadi kapopohokeun.
Ku kituna, Pamaréntah Kota Bandung ngaliwatan Dinas Perhubungan (Dishub) perlu geura ngalakukeun pendataan sarta ngoméan sacara gembleng lampu-lampu PJU anu pareum. Pamaréntah ogé diusulkeun pikeun ngalakukeun patroli pangawasan rutin dina waktu peuting, ngaganti lampu heubeul ku lampu LED anu leuwih awét, sarta nyadiakeun layanan pangaduan warga anu gancang direspon jeung transparan. Ku léngkah nyata éta, kaamanan jeung kanyamanan nu ngagunakeun jalan di Kota Bandung dipiharep bisa kajamin deui.
Alfaiq Ihsanidhiya Dhafy Jl. Sekarwangi, Dusun Cikeresek RT 001/RW 003, Desa Sekarwangi, Kecamatan Buahdua, Kabupaten Sumedang, Jawa Barat






































Comments