Ku: Kohar Rasyidin
PANON poé isuk-isuk moncorong nembus halimun ipis luhureun taneuh Tatar Sunda. Hawa tiis ngahiliwir, mawa harewos hibar sajarah nu ngagedur dina ati sanubari.
Di dinya, di satengahing lebak jeung pagunungan nu agreng, sumanget kamerdikaan ngahuru, ngaduruk manah para pajoang nu taya capé. Aranjeunna, pahlawan nu bela pati, ngagambarkeun perjuangan panjang pikeun kamerdekaan. Cimata kanyeri pacampur kesang jeung getih, ngocor , minangka bukti pangorbanan maranéhna
Ngolebat dina tiap lengkah, kanyeri jeung katunggaraan nu teu kaukur. Sanajan kitu, sumanget juang teu pernah luntur. sumanget revolusi ngagedur dina manah para pajoang , ngagerakkeun urang ngudag cita-cita anu mulya nyaeta semangat kamerdikaan.
Perjuangan henteu salawasna mulus. Halangan demi halangan datang silih berganti, nguji kasabaran jeung tekad. Korban ting golepak, tapi sumangetna henteu luntur. Ti generasi ka generasi, sumanget perjuangan diturunkeun,lir ibarat ranté ngabengket nyambungkeun baheula, ayeuna, jeung mangsa nu bakal datang. Carita-carita kapahlawanan aranjeunna janten inspirasi anu langgeng, ngagedurkeun nurani unggal generasi anu bakal datang.
Kamerdikaan tungtungna sumping, nandaan ahir jaman kolonial anu panjang sareng poék nu pinuh ku kasangsaraan jeung katunggraan. Bandéra Beureum Bodas ngalayang reueus, nandakeun kameunangan anu dimeunangkeun. Sora-sora “Takbir” (seruan Islam pikeun kamerdékaan) ngagema, ngedalkeun rasa syukur kana ni’mat Gusti Nu Maha Suci. Ditengah euforia kameunangan, rasa émosi sareng sukur ngeusi unggal haté. Cimata kabungah pacampur jeung seuri, nyipta kaharmonisan nu éndah tur nyugemakeun.
Ayeuna, urang ngarasakeun hasil perjuangan para pahlawan. Kamerdékaan nu geus kahontal ku pangorbanan nu gedé, ieu teh mangrupa amanah nu kudu dijaga jeung dipiara. Hayu urang salawasna émut kana jasa para pahlawan, neraskan perjoanganana ku cara ngeusian kamerdékaan ieu ku hal-hal anu positif sareng mangpaat pikeun bangsa sareng nagara. Mugia sumanget kapahlawanan tetep ngagedur dina sanubari satiap anak. *
* Kohar Rasyidin, alumnis S2 Komunikasi Penyiaran Islam (KPI) Sunan Gunung Djati, tanaga kapendidikan di Tata Usaha Pascasarjana UIN Bandung, nganjrek di Bandung, Jawa Barat.
Comments