Kecap Dapur

Nu Ngabageakeun Ka SundaNews, Lir Buah Mimiti Leubeut Meuhpeuy

0

 

 SundaNews (27-11-2024).  Ceuk babasan, lamun keyeng  tangtu pareng. Eta oge falsafah nu dijadikeun tombak pamikiran jeung tekad SundaNews kiwari. Sabab memang rumasa jeung kudu nalipak maneh we deuih, yen SundaNews teh media massa digital munggaran di dunya dina basa Sunda. Media ieu kakara borojol tur hirup dina ekosistem digital  ti mimiti 10 November 2024 kamari. Jadi umurna teh can manjing sabulan.

Kalahiran SundaNews kaitung lancar, teu loba rereged, komo deui sasalad  mah. Dipaseuk ku tegad nu buleud panceg, SundaNews boga kahayang pikeun ngilu aub ngarawat, ngariksa, ngamumule tur mikanyaah basa katut budaya Sunda. Kaasup di jerona ngawengku sagala rupa nu pakuat-pakait jeung alam kahirupan kasundaan, boleh subjek jelemana sing saha wae nu ngaku jeung ngarasa urang Sunda, boh uger adat-istiadat, paripolah, sarta etika sosial budaya katut agamana.

Hartina, lain ngengklakan perkara basa wae, atawa  madungdengkeun perkara media nu make basa Sunda wae. Tapi leuwih ti kitu, nyaeta sangkan barudak, rumaja, jeung balarea warga Sunda nu geus darewasa, daek, resep, jeung nyaah ka basa, tradisi, jeung budaya Sunda.  Ngarasa reueus deuih mun cumarita dina basa Sunda. Komo bisa pertentang dina wanda tulisan mah.

Palebah dinya, kacida gede pisan fungsijeung pancen media basa Sunda samodel SundaNews teh. Komo apan SundaNews mah sasangkleng dedegler bewara yen dirina teh media massa digital munggaran di dunya dina basa Sunda. Jadi lain tekad nu cetek. Lain oge nu miboga mental epes meer, komeok samemeh dipacok. Angkeuhanana, SundaNews hayang nembongkeun sikep nu leber wawanen bari jeung dideudeul ku pakakas profesionalisme. SundaNews dipahing pisan jadi media abal-abal.  Media kajajaden ceuk urang lembur singkur mah. Media ieu ngeureuyeuh dikokolakeun sacara profesional.

Tah, meureun para pamaca oge mimiti bisa ngajeueung ti kadeukeutan, ka mana guluyurna SundaNews dina saban midang unggal poe teh.  Horeng para inohong, kekentong, tokoh, panyair, artis, dosen, guru besar, para pajabat kampus, bentang pilem, teu sirikna pada tuturubun ngabageakeun SundaNews. Palebah dieu, ais panganpih SundaNews kacida bungah reujeung reueusna. Asa aya jalan komo meuntas.

Iklan kecap bagea ka SundaNews tayang meh unggal poe. Malah nepi ka diantrikeun jadwal midangna. Ceuk babasan mah, pangbagea ka SundaNews teh lir buah anggur nu mimiti moronyoy leubeut meuhpeuy. Estuning ngondang rasa pikabitaeun.

Salah sahiji kekentong jeung inohong nu ngabageakeun kalahiran SundaNews sangkan apanjang-apunjung nanjeur jadi kareueus warga Sunda sakabeh, nyaeta Dr  H. Asep Salahudin, MSi ti Suryalaya, Tasikmalaya. Inyana nyangking landian nu ngaberendel, di antarana sabage dosen, cendekiawan nyongcolang NU, penyair, ajengan nu remen safari ka tempat-tempat patilasan sajarah para ulama kahot di Indonesia, kolumnis, cerpenis, esais, sarta  rektor di IAILM Suryalaya, Tasikmalaya. Leuwih ti kitu, Asep Salahudin icikibung oge di PWNU Jawa Barat. Atuh di tingkat nasonal, Asep Salahudin nyangking jabatan sabage Staf Ahli Unit Kerja Presiden Pembinaan Ideologi Pancasila (BPIP).  Hiji jabatan nu dipikaserab pisan ku balarea.

Tah, dina SundaNews edisi Kemis 28 November 2024, salah sahiji karya puisina, bakal dipidangkeun. Sugan we atuh puisi Asep Salahudin ieu teh jadi jontrot pikeun narik sarta ngagentraan para nonoman, panyair, carponis, esais, kolumnis, jeung saha wae nu kataji ku seni budaya jeung sastra Sunda, pikeun ngagabung ka SundaNews. Carana nu paling gampang mah ku cara  ngirimkan karya-karyana sabangsaning  carita humor barakatak, carpon, carpon alit (fiksimini), kolom, jeung puisi dina basa Sunda. Teu kudu make parangko ayeuna mah, da apan jirimna geus dina wangun media digital. Cukup dipalidkeun ngaliwatan chat WA. Sabatae, rek iraha wae, ti mana wae, jeung  ku saha wae. Cag!

You may also like

Comments

Leave a reply

Your email address will not be published. Required fields are marked *