Ku: Ridhazia
DIBERITAKEUN, politisi Dony Ahmad Munir pindah partéy. Sacara resmi, Bupati Sumedang éta ayeuna jaadi anggota Partai Gerindra.
Padahal, akar idéologi kulawargana geus lila napak dina Partai Persatuan Pembangunan (PPP) ti karuhunna. Malah, karuhunna kungsi janten politisi jeung wakil rahayat ti partéy Islam éta.
Kutu Loncat. Frasa anu ilahar dipaké pikeun nyebut politisi anu pindah-pindah partéy pulitik nyaéta “kutu loncat”.
Ieu mangrupakeun métapora ngeunaan serangga leutik anu hirupna kaasup paling primitif. Salaku hama anu ngabahayakeun, éta serangga teu kungsi wareg nyeuseup getih inangna, tuluy pindah deui ka inang séjénna.
Sok Haus. Kalayan kecap séjén, politisi “kutu loncat” teu kungsi ngarasa cekap pikeun nyumponan nutrisi ambisina. Sajeroning hirupna, manéhna terus-terusan haus kakawasaan.
Nalika partéy anu ditinggalkeunana mimiti “garing”, manéhna langsung beberes pikeun pindah ka partéy anyar anu leuwih ngagoda.
Ka publik jeung para pendukungna, politisi “kutu loncat” mindeng méré alesan yén tantangan geus mimiti ngurangan, atawa rutinitas geus matak bosen.
Teu Payu. Padahal kanyataanna, partéy heubeulna geus teu payu deui. Manéhna ogé geus lila boga niat pikeun ngagancangkeun kamekaran jangjang karirna, pikeun nyingkahan cap salaku parasit anu ngan saukur numpang ngaliwat.
Kalayan kecap séjén, manéhna ngabelaan diri yén pindah partéy lain lantaran teu satia, komo deui plin-plan. Ceuk manéhna, dunya téh lega teuing lamun kudu cicing di hiji tempat wungkul.
Ku ngaluncat, manéhna miharep meunang sudut pandang anyar di tempat anu béda. Ngaluncat téh mangrupa stratégi, lain saukur kabur. Sabab manéhna ngarasa pantes ngahontal puncak karir pangluhurna anu diimpi-impikeun, sanajan nepi ka kiwari masih dirahasiakeun.*
* Ridhazia, dosen senior Fikom UIN Sunan Gunung Djati, jurnalis jeung kolumnis, paniten psikologi jeung pasualan komunikasi sosial pulitik, nganjrek di Bandung, Jawa Barat.
Comments