Ku: Ridhazia
NAEK gunung ogé kaasup cara pikeun healing. Komo deui lamun rekreasi alamna ramah pikeun budak, kaasup incu pangbungsuna nu kakara umur dalapan taun.
Gunung Pangradinan di Cikancung, Kabupatén Bandung, kalayan jangkungna 1.236 méter di luhur beungeut laut (MDPL), ahirna jadi pilihan pikeun ngareureuhkeun pikiran bari ngarasakeun kaéndahan alam.
Ramah Tanjakan
Medan Gunung Pangradinan kawilang ramah pikeun petualangan pondok. Kalawan léngkah santai, puncakna bisa dihontal dina waktu kurang leuwih 60 menit.
Tanjakan nu kacida lungkawingna ngan aya di awal jalur, nyaéta Tanjakan Usus. Ieu bagian cukup nguras tanaga nepi ka nu naék sok ngarasa engap. Sanggeus éta, jalurna leuwih ngalandai sanajan tetep ngabengkok.
Disebut Tanjakan Usus lantaran sudut kamiringanana mindeng matak seueul, nepi ka karasa siga beuteung diaduk-aduk nu ahirna nyababkeun peujit karasa mulas.
Miniatur Merbabu
Sanggeus nepi ka puncak Gunung Pangradinan, rasa capé langsung kabayar ku lega hamparan sabana héjo nu upluk-aplak. Perpaduan antara padang jukut jeung tatangkalan nu lega ngajadikeun suasanana sarupa jeung Gunung Merbabu di Jawa Tengah.
Ti puncak gunung, nu datang ogé bisa ngarasakeun segerna angin jeung hawa pagunungan bari nyaksian pamandangan nu kacida éndahna ka urut Cekungan Bandung.
Cekungan éta mangrupa titinggal situ purba nu kabentuk alatan bituna Gunung Sunda Purba. Kiwari, éta wewengkon geus robah jadi Kota Bandung jeung daérah sabudeureunana. *
* Ridhazia, dosen senior Fidkom UIN Sunan Gunung Djati, kolumnis, paniten psikologi jeung pasualan komunikasi sosial pulitik, nganjrek di Bandung, Jawa Barat.
Comments