By 
Ku: Ridhazia
Tibatan dijieun jadi jambatan kabébasan, sabenerna internet teh malah nyuntrungkeun manusa ka jero pangberokan (penjara). Ngan loba jelema nu henteu sadar yen maranehna geus dibobodo. Dumeh meureun kawas nu kapincut atawa kahipnotis ku kacanggihan internet.
Paradoks ieu nyababkeun manusa lain ukur jadi tawanan, tapi ogé kabeungkeut dina hubungan hampang. Salian ti nyorangan, ogé beuki dangkal mikirna.
Candu Nu Ngabobodo
Sistem algoritma dina internet nu didesain sangkan gampang néangan informasi, sabalikna malah jadi candu.
Malah sababaraha média sosial jadi mabok, utamana keur nu resep pamer citra diri. Jadi saluran pikeun ngumbar kasuksesan pribadi. Asa aing uyah kidul. Asa aing pangpinterna atawa pangbeungharna.
Analisis kritis ieu dikedalkeun ku jurnalis Amérika Nicholas G. Carr dina bukuna The Shallows: What the Internet Is Doing to Our Brains (2010). Sanajan kitu, urang oge kudu paham, yen internet teu salawasna nyilakakeun. Loba oge mangpaat tina ngagunakeun atawa akrab jeung internet teh. Palebah dieu, teu beda ti patani nu nyoren bedog. Naha eta bedog rek dipake pikeun tujuan nu hade atawa tujuan nu goreng picilakaeun, gumantung ka jinisna sewang-sewangan. *
* Ridhazia, dosen senior Fidkom UIN Sunan Gunung Djati, jurnalis jeung kolumnis, paniten psikologi jeung pasualan komunikasi sosial politik, nganjrek di Bandung, Jawa Barat.
Comments