By 
SundaNews (2-1-2025). Prof Dr H Nanat Fatah Nasir, MS, Rektor UIN Sunan Gunung Djati Bandung dua periode 2003-2011, tur kungsi jadi Ketua Presidium ICMI Pusat, tilar dunya di RS Al Islam Kota Bandung, Kemis 2 Januari 2025 jam 02.00 WIB dina yuswa 70 taun. Garwana mah geus wafat ti heula tilu taun ka tukang.
Ridhazia, dosen senior Fakultas Dakwah jeung Komunikasi (Fidkom) UIN Bandung no oge sobat dalit Prof Nanat netelakeun, almarhum salaku cendekiawan muslim miboga dedikasi nu nyongcolang utamana kana widang elmu, ka UIN Bandun, katut ka ormas sosial kaagamaan Ikatan Cendekiawan Muslim Indonesia (ICMI) tingkat regional provinsi Jabar jeung tingkat nasional.
“Prof Nanat mangrupi figur ilmuwan sareng pamingpin masagi panyebar inspirasi, antawisna sabage rektor anjeunna sukses ngareformasi IAIN janten UIN. Ieu buktos tekad sareng tarekah nu rongkah almarhum dina raraga nempatkeun paguron luhur agama Islam nagri sajajar kadudukan sarta pamorna sareng perguruan tinggi sanesna di Indonesia,” cek Ridhazia ka SundaNews.
Sajaba ti eta, komitmen almarhum dina widang kaislaman jeung kanagaraan dibuktikeun ku cara jadi tokoh muslim nu teu weleh aktip dina organisasi kaislaman, di antarana Himpunan Mahasiswa Islam (HMI), KAHMI, jeung ICMI. Almarhum oge dina jaman mahasiswa jadi aktivis kampus tingkat nasional.
Tilu bulan ka tukang, almarhum no sok rajin olah raga joging unggal poe, sok nyempetkeun ngadon silaturahim tur diskusi jeung Ridha sobatna di komplek Panyawangan Cileunyi, Kabupaten Bandung. Dina harita eta pisan, Prof Nanat ngedalkeun niatna hayang nyieun jeung nerbitkeun buku biografi ngeunaan perjalanan hidup jeung karirna di jero jeung di luar kampus.
Beh dituna buku biografi ieu minangka kado atawa alpukah jalaran inyana purnabakti ti UIN Bandung dina 11 Desember 2024, pas yuswana nincak 70 taun. Almarhum lahir di Cikelet, Kabupaten Garut, Jawa Barat, 11 Desember 1954. Buku biografi ieu ditulis ku Ridhazia jeung Pasca Muhammad. “Almarhum taliti apik imeut pisan dina marios materi naskah biografina, ciren almarhum figur akademisi mumpuni,” cek Ridhazia.
Geus direncanakeun, malah geus dicitak undangan pikeun Presiden Prabowo Subianto, ketua MPR, menteri agama, tur gubernur Lemhanas. Kitu deui ondangaa pikeun sajumlah cendekiawan, aktivis, jeung politisi di Indonesia geus disiapkeun. Para undangan eta teh saencana geus mere testimoni (kasaksian) pikeun buku bigorafi Prof Nanat. Ngan rencana milad 70 taun ieu teh dikensel can bisa kalasanakeun dina waktuna kusabab Prof Nanat kaburu brek teu damang.
Jenazah almarhum dikurebkeun di TPU Ciburuy, tukangeun RS Sartika Asih, Jl Mohamad Toha Bandung, Kemis 2 Januari 2024 samemeh wanci lohor. Ratusan dosen, aktivis, keluarga besar UIN Bandung, cendekiawan, para pejabat pamarentahan tur politisi, haladir nungkulan. Kitu deui ucapan belasungkawa sarta pangjajap doa ka almarhum sumebar euyeub r dina rupa-rupa media sosial. (sir)
Comments