Ku: Ridhazia
TIYO Ardianto, Présidén Mahasiswa BEM-UGM Yogjakarta anu viral lantaran ngalontarkeun kritik anu kacida peureusna ka pamaréntahan Prabowo, nepi ka ayeuna masih kénéh éksis sarta teuneung ludeng (tangguh).
Padahal, lalawanan ka tokoh mahasiswa anu keur kuliah dina jurusan filsafat éta henteu éléh ngangkrang. Henteu ngan saukur dina wangun pernyataan, tapi ogé dibarengan ku intimidasi jeung ancaman. Malah disebut-sebut kungsi “jadi sasaran intel” ku aparat nagara sanajan pihak istana ngabantah hal éta.
Oposisi Prabowo
Kacerdasan Tiyo pikeun ukuran mahasiswa geus ampir sarua jeung panitén pulitik Rocky Gerung. Kabeneran duanana sarua ngulik élmu filsafat.
Aya hiji adagium nu nyebutkeun yén jalma anu diajar filsafat biasana leuwih kritis. Malah sok katingali béda lantaran geus biasa mikir di luar pola umum (think outside the box).
Tiyo henteu ragu pikeun nanyakeun rupa-rupa hal ku cara mikir anu radikal, rasional, jeung sistematis. Sikep éta nurutan conto para filsuf saméméhna anu ngadeukeutan kahirupan ku sudut pandang dunya anu béda.
Pamanggihna ogé henteu kaiket ku “tradisi” anu geus ngakar tina kabiasaan nuturkeun arus utama atawa doktrin anu geus aya. Sabalikna, manéhna malah mindeng ngaragukeun kabiasaan éta sarta néangan bebeneran nepi ka akar pasualan.
Kitu deui Tiyo. Manéhna milih ngantepkeun hal-hal anu dianggap sepele sarta leuwih museur kana patalékan éksisténsial anu jarang dipikiran ku batur, sanajan sakapeung katingalina henteu napak di bumi.
Pikeun dirina, réalitas anu katempo dina beungeut permukaan téh pantes dipaluruh jeung dipertanyakan ku logika, lain ku subjektivitas atawa khayalan.
Hal éta ogé anu ngabentuk Présidén BEM-UGM miboga karakter kritis sarta nunjukkeun béda dibandingkeun jeung rata-rata aktivis kampus séjén.
Manéhna ogé mawa BEM-UGM milih jalan anu béda jeung BEM ti kampus séjén, sangkan bisa meunangkeun rohangan kabébasan mikir jeung jalur skeptis dina nyanghareupan rupa-rupa pasualan.*
* Ridhazia, dosen senior Fidkom UIN Sunan Gunung Djati, jurnalis jeung kolumnis, paniten psikologi jeung pasualan komunikasi sosial pulitik, nganjrek di Bandung, Jawa Barat.
Comments