Ku: Ridhazia
SKUAD Tanjung Verde (Cape Verde) hasil ngabuktikeun ka dunya sanggeus sanggup nahan imbang juara bertahan Argentina 2-2 salila 90 menit pertandingan.
Sanajan ahirna éléh 3-2 dina babak perpanjangan waktu, nagara kapuloan leutik éta tetep hasil ngajaga ajén diri minangka salah sahiji tim nasional anu tangguh.
Tanjung Verde Éta Aya di Mana?
Waktu ngaran Tanjung Verde mimiti jadi bahan obrolan, loba pencinta maén bal nanya, sabenerna éta nagara aya di mana? Naha bisa miboga pamaén anu kacida hebatna?
Tétéla, Tanjung Verde atawa Cape Verde mangrupa nagara kapuloan vulkanik di Samudra Atlantik, perenahna kurang leuwih 600 kilométer di beulah kulon buana Afrika, kalayan ibu kota di Praia.
Jumlah pendudukna ukur sakitar 500 rébu jiwa. Sanajan kitu, kualitas atikanana kaasup salah sahiji anu panghadéna di Afrika.
Hartina, lamun dibandingkeun jeung rata-rata nagara di buana Afrika, Tanjung Verde kaasup nagara anu cukup maju.
Carita Mujijat
Tanjung Verde ngukir sajarah anu luar biasa dina Piala Dunia 2026. Salaku tim debutan, maranéhna hasil lolos ka babak 32 besar, kaasup sanggup méré lalawanan sengit ka Argentina di Stadion Miami.
Dilatih ku Pedro “Bubista” Leitao Brito, tim anu dijulukan The Blue Sharks ieu lolos ka fase gugur sanggeus jadi runner-up Grup H kalayan catetan teu kungsi éléh. Tina tilu pertandingan, kabéhanana réngsé imbang, nyaéta ngalawan Spanyol 0-0, Uruguay 2-2, jeung Arab Saudi 0-0.
Kakuatan tim nasional Tanjung Verde tétéla loba ditopang ku pamaén diaspora anu maén jeung ngawangun karir di rupa-rupa klub Éropa. Pangalaman maranéhna di kompetisi Éropa mawa standar kaulinan anu leuwih luhur ka tim nasional.
Sababaraha pamaén asal Tanjung Verde anu ayeuna ngabéla klub-klub Éropa di antarana Logan Costa jeung Jovane Cabral di Portugal, Kevin Pina di Rusia, sarta Garry Mendes Rodrigues di Siprus.*
* Ridhazia, dosen senior Fidkom UIN Sunan Gunung Djati, kolumnis, paniten psikologi jeung pasualan komunikasi sosial pulitik, nganjrek di Bandung, Jawa Barat.
Comments