Ku: Bintang Rizky Irawan
DINA sababaraha taun pamungkas, Kota Bandung beuki ngaraketkeun identitasna minangka “kota kreatif” anu terus ngembang dina sagala rupa widang. Kamekaran ieu henteu ngan karasa di pusat kota, tapi geus nyebar ka suklak-sikluk kampung anu ayeuna mimiti ngahudangkeun poténsi lokalna.
Ekonomi kreatif ayeuna jadi tulang tonggong anyar pikeun loba warga, ti nu geus kulina usaha nepi ka barudak ngora anu nempo yén kreativitas téh lain ukur bakat, tapi ogé jadi ladang panghasilan.
Dina jaman ayeuna, unggal poé urang bisa nempo kumaha rupa-rupa produk kreatif sumebar ngaliwatan marketplace, média sosial, jeung acara komunitas. Anjeun bisa manggihan usaha coffee shop rumahan, distro anyar karya anak muda, fotografer freelance, nepi ka ilustrator Sunda anu ngangkat budaya lokal dina gaya visual modern. Tren ieu nunjukkeun yén warga Bandung leuwih wani nyoba hal anyar sarta henteu sieun pikeun nembongkeun identitasna.
Sanajan kitu, kamekaran ieu teu salawasna lempeng. Persaingan usaha beuki ketat, sabab unggal individu ayeuna miboga aksés kana platform digital nu sarua pikeun promosi. Loba pelaku UMKM ngeluh yén konsumen beuki milih produk anu unik jeung instan, nu maksa maranéhna kudu terus adaptasi. Dina kaayaan kitu, literasi digital jeung daya inovasi jadi kuncén pikeun salamet di tengah gelombang kompetisi anyar.
Di sisi séjén, dukungan pamaréntahan jeung komunitas kreatif beuki karasa. Sababaraha program saperti pelatihan branding, workshop kontén kreatif, nepi ka fasilitas co-working space jadi bukti yén kota ieu memang serius ngarojong ékosistem kreatif. Tapi, aya ogé kritik yén pendampingan acap henteu rata, sabab loba daerah pinggiran kénéh kurang diajak maju babarengan.
Digitalisasi ogé ngajadikeun budaya Sunda meunang panggung anyar. Musik pop Sunda, kontén komedi basa Sunda, jeung fashion etnik lokal jadi leuwih gampang kapanggih tur diaprésiasi. Tapi dina waktu nu sarua, aya rasa waswas yén arus tren luar bakal ngurangan rasa mikanyaah kana budaya sorangan lamun teu dibarengan ku kasadaran kolektif pikeun ngajaga jati diri urang.
Ahirna, kamekaran ekonomi kreatif di Bandung téh lain ukur soal bisnis, tapi gambaran kumaha warga ngawangun jati diri anyar dina jaman digital. Tantangan jeung kasempetan datang babarengan, jeung tugas urang nyaéta milih kumaha carana supaya kreativitas bisa jadi kakuatan pikeun ngamajukeun diri sorangan jeung kota urang.
Bandung ayeuna keur mekar—sarua jeung urang-urangna nu terus diajar, nyoba, jeung berani maju. Ieu téh bukti yén kreativitas teu boga wates, salila urang daék ngarawatna jeung maké pikeun kahadéan babarengan.
*Bintang Rizky Irawan, mahasiswa Prodi Ilmu Jurnalistik Fidkom UIN Sunan Gunung Djati, mikaresep pasualan nu pakait jeung ekonomi masyarakat pakotaan, nganjrek di Bandung, Jawa Barat.
Comments