Batik: Nembongkeun Kabeungharan Cagar Budaya

Ku: Siti Habibah Latifah 

 SundaNews (30-11-2024). Batik mangrupa warisan budaya Indonésia anu camperenik tur geus dipikawanoh di sakuliah dunya. Taun 2009, Unesco ngadeklarasikeun yen batik teh minangka warisan budaya tak benda. Pikeun taun-taun ayeuna, lawon atawa kaen tradisional ieu loba katingali dipintonkeun di panggung internasional. Tangtuna oge matak reueus pikeun urang sakabeh salaku bangsa Indonesia nu pituin ngabogaan batik.

Sawatara paméran batik geus  dilaksanakeun di kota-kota  puseur internasional  saperti Paris Perancis, Qatar,   jeung New York,  Amerika Serikat. Ditembongkeun kalayan daria yen batik teh lambang kaéndahan sarta karagaman budaya Nusantara.

Kagiatan paméran sareung  jeung batik anyar dilaksanakeun deui, nya éta kagiatan “Batik: The Beauty and Beyond”  di Hotél Moskva, Rusia 24 November 2024, saperti nu dicutat ku Antarnews.com.

Kasuksésan batik di panggung internasional teu leupas tina pangrojong pamaréntah Indonésia jeung usaha masarakat di sajumlah wewengkon puseur batik saperti Pekalongan, Solo, Yogjakarta, Cirebon, Garut,  dina ngaronjatkeun pamor sarta kabudayaan jeung tradisi batik jeung ngabatik.  Salaku cagar budaya pituin Indonesia, batik memang geus sawadina diapungkeun ka jomantara.

Pikeun masarakat Indonesia sorangan, boh di utamana di Pulau Jawa boh di Sumatera, Sulawesi katut Kalimantan,  batik geus jadi tradisi budaya sapopoe. Malah beh dituna batik teh geus dijadikan seragam pagawe  kantor-kantor pamarentah jeung swasta. Dina poe-poe nu geus ditangtukeun, kabeh pagawe wajib marake batik. Cek barudak milenial tea mah, tiada hari tanpa batik.

Ku kituna, munasabah mun Indonesia raweuy panghargaan jeung prestasi tina rupa-rupa pameran sarta lomba nu dikaitkeun jeung pabatikan. Tah, minangka salah sahiji apresiasi sangkan nancep jadi tradisi, pamarentah geus netepkeun yen unggal tanggal 2 Oktober dijadikeun sabage Poe Batik Nasional.  Atuh urang sakabeh,  sawadina dina poe eta mah kudu hideng sorangan make baju batik. Malah alusna mah diramekeun ku rupa-rupa lomba ngeunaan batik. *

             *Siti Habibah Latifah, mahasiswa Program Studi Jurnalistik Fidkom UIN Sunan Gunung Djati nu keur ngeureuyeuh ngamimitian nyusun skripsi, nganjrek di Cianjur, Jawa Barat.