Ku: Ridhazia
Gas melon kalayan stempel “hanya untuk masyarakat miskin” ngadadak ngaleungit di pasaran. Dina ayana oge hargana salangit alias hamo kahontal ku warga miskin mah. Potrét jeung suguhan video media sosial nu nembongkeun antrian gas melon di mamana estuning matak ngangres pikasediheun. Asa kabina-bina teuing.
Jumlah Penduduk Miskin
Sakieu, jumlah penduduk miskin di Indonesia. Dina vérsi Badan Pusat Statistik (BPS), jumlahna ngahontal 24,06 juta urang atawa sarua jeung 8,57% tina total populasi per Séptémber 2024.
Dina Januari 2025, jumlah penduduk Indonesia ngahontal 283,49 juta jiwa. Jumlah ieu nempatkeun Indonesia di peringkat kaopat nagara kalayan jumlah penduduk panglobana di dunya.
Ironis Nagara Kaya
Dumasar kana Global Finance, Indonesia kaasup kana 100 nagara pangmiskinna di dunya.
Tapi ironisna, Indonesia ogé rangking ka-7 di antara ekonomi panggedéna di dunya.
Kamiskinan anu paling nyata kaciri di pulo pangpadetna di Indonesia, nyaéta Pulo Jawa, anu dihuni ku leuwih ti 150 juta penduduk. Angkana di kisaran 13,24 juta jiwa.
Sarta, Jawa Barat jadi propinsi kalayan penduduk miskin urban panglobana. Ditaksir aya 2.921.520 jiwa. Sedengkeun Jawa Timur jadi propinsi kalayan penduduk miskin di désa panglobana. Jumlahna 2.399.990 jiwa.
Wajah Miskin Indonesia
Miskin di Indonesia boga rupa-rupa sebutan. Baheula disebut kamalarat, kafakiran, kapapaan, kerudinan, jeung kagembelan. Ayeuna disebut prasejahtera.
Bédana ngan ukur dina definisi. Kanyataanana, hiji jalma disebut miskin lamun henteu bisa nyumponan kabutuhan dasar dahareun jeung non-dahareun lantaran panghasilanna henteu cukup.
Kemiskinan di Indonesia dipatok lamun panghasilan ukur Rp 582.932 per kapita per bulan. Atawa, saurang penduduk dikategorikeun miskin lamun bélaan belanja dahareun ukur Rp 424.160 per kapita per bulan, jeung belanja non-dahareun Rp 132.714 per kapita per bulan.
Lamun diitung per poé, mangka pengeluaran per kapita penduduk miskin di Indonesia ngan ukur Rp 19.431. Sedengkeun di nagara tatangga geus dipatok Rp 30.000.
Matak pikasediheun…
*Ridhazia, dosen senior Fidkom UIN Sunan Gunung Djati, jurnalis jeung kolumnis, paniten psikologi jeung pasualan komunikasi sosial pulitik, nganjrek di Bandung, Jawa Barat.
Comments