Ku:Annida Khofia Sabila
DINA jaman kiwari, konsumsi media geus jadi bagian tina napas kahirupan sapopoe. Saban poe urang disuguhan rupa-rupa konten, ti hiburan nepi ka informasi, anu henteu bisa dipisahkeun tina kabiasaan anyar masyarakat. Perubahan ieu datangna saperti rerencepan, kawas nu teu disadari, tapi laun-laun ngawangun cara urang mikir jeung ngarasakeun dunya sabudeureun.
Salah sahiji fenomena anu paling katingali nyaeta kumaha warga leuwih resep kana konten singket jeung gampang dicerna. Media sosial nyayogikeun sagalana sacara instan, ngarah pamake karasa kanyamanan bari henteu kudu mikir jero. Ieu hal nyiptakeun pola anyar nyaeta, urang leuwih sering nyokot ringkesan tibatan carita lengkep.
Padahal, kabiasaan konsumsi ringkes ieu sacara teu langsung mangaruhan cara urang nyanghareupan informasi. Lila-lila, anu penting lain kumaha emut kana eusi, tapi kumaha gancang konten eta nyangkut dina perhatian. Media sosial ngajadikeun perhatian jadi komoditas, sedengkeun urang jadi konsumen anu sok lapar kana hal-hal anyar.
Perubahan ieu oge patali jeung budaya urban anu beuki dinamis. Jalma-jalma ayeuna sok milih informasi nu enteng, nu bisa dibaca bari ngopi, bari diangkutan umum, atawa bari istirahat di tempat gawe. Konten singket teh jadi pelarian leutik di tengah hiruk-pikuk kahirupan kota.
Sanajan kitu, konsumsi media nu leuwih ringkes teu salawasna mawa dampak goreng. Aya oge momen dimana kontén singket bisa ngajembatanan jalma pikeun leuwih mikawanoh topik nu tadina jauh. Ngan masalahna, teu kabeh pamake neruskeun ka tahap ngulik leuwih jero.
Di dieu pentingna kaparigelan pikeun ngatur sabaraha loba urang ngonsumsi informasi sapopoe. Layar memang muka loba jalan, tapi lamun teu dipilih kalayan tenang, bisa jadi urang leuwih sering kabawa ku arus tibatan ngatur arah sorangan. Literasi dina migunakeun media janten pangabisa sosial anu perlu diasah ku generasi ayeuna.
Akhirna, konsumsi media teh henteu ukur soal naon anu urang tonton, tapi kumaha eta ngawangun sikap jeung pola mikir urang. Dina dunya anu beuki rame ku distraksi, bisa mikir jernih teh jadi kaparigelan langka. Mangka, meureun waktuna pikeun ngahudangkeun pertanyaan sederhana: naha urang nu ngatur media, atawa media nu ngatur urang?*
*Annida Khofia Sabila, mahasiswa Prodi Ilmu Jurnalistik Fidkom UIN Sunan Gunung Djati, mikaresep pasualan ngeunaan generasi Z jeung media digital, nganjrek di Bandung, Jawa Barat.
Comments