Kaadilan Tujuh

Ku: Tatang Sumarsono

Nuar cau meunang saturuy
kateuing tadina pelak saha
lumayan tujuh sikat kabéhna

Seuhangna nya bagian kuring
da apan anu boga jasa
manggihan jeung nuarna

Pamajikan boga bagian sasikat
sarua jeung hancengan si cikal
katut si panengah jeung si bungsu

 Anu sasikat dipénta ku mitoha
adi beuteung gé sarua ménta bagian
kitu adilna apan kabehna tujuh

 Aranjeun mah tong teuing hayang
mending gé jig melak sorangan
sugan aya kénéh sésa tanah sengkéta

 26 Oktober 2024

Ngan Kari Puisi

ngan kari puisi, sesemplékan nu nyésa
wadahna katugenah, nyoarakeun rasa
kaadilan pikeun balaréa, sabab panjara
teu weléh ngabibiraan, pantona muka

ngan kari puisi, satia nampa bangbaluh
nasib maranéhna anu remen ngangluh
sanggeus dadana dikampa tepi ka hapa
padahal di ieu nagara apan hakna sarua

 ngan kari puisi, dipidalit mangsa bungah
barudak nu kakawihan di buruan, jigrah
aya kénéh kanyaah Gusti, jeung harepan
didawamkeun dina munajat, nyorangan

 ngan kari puisi, geterna anu ngaronghéap
kaasih, susuganan ku anjeun bakal dihiap

 16 Desember 2019

*Tatang Sumarsono, dosen, jurnalis, caprponis, novelis, budayawan jeung sastrawan Sunda, dua kali  dileler Hadiah Sastra Rancage, dumuk di Bandung, Jawa Barat.