By 
SundaNews, 28-11-2024. Band rock asal Kabupaten Subang, Jawa Barat, nu nyebut dirina SKRL, dina Agustus 2024 nu kamari geus midangkeun atawa ngarilis hiji mini albeum, minangka mepeling 15 taun kiprah manehna di dunya musik Indonesia. Albeum nu dijejer Metamorfosa sukses diluncurkeun ku SKRL.
SKRL kiwari dikokojoan ku Bony minangka vokalis,Yudi (gitar), Heri (bas), Zaenal (kibor), sarta Ate panabuh bedug Inggris. Grup ieu ngarasa bungah tur reueus sanggeus ngadeg taun 2008 atawa 16 taun ka tukang, geuning kiwari masih miboga keneh kasempetan pikeun manggung tur meunang sukses ku alpukahna albeum Metamorfosa.
Aya lima tembang andelan di mini albeum Metamorfosa teh, nyaeta Sahabat Lama, Kamu, Jadi Duda, Hypocrate, sarta Metamorfosa. Bony saparakanca miharep mini albeum ieu bisa nambah sarta mingkin ngaronjatkeun musik rock di lemah cai.
Malah satuluyna, ceuk Bony salaku pupuhu SKRL Band, mini albeum ieu oge bisa ditarima ku para penggemar SKRL sarta pecinta musik di lemah cai, kusabab memang geus lila dipiharep kamunculanana teh. “Lagu-lagu SKRL, alhamdulillah geuning tos seueur diarantosan ku balarea, utamana mah ku para penggemar musik rock,” ceuk Boy nandeskeun.
Lima tembang dina mini albeum eta teh sajatina ngaberelekeun lalampahan SKRL di dunya musik Indonesia. Munasabah tembang-tembang nu dipidangkeun teh ngabogaan kaitan carita antara lagu nu hiji jeung lagu nu sejenna.
Upamana wae carita hirup para personelna, perkara babaturana, oge pangalaman sapope maranehna dina enggoning neuleuman dunya musik rock. Beh dituna dicaritakeun oge pasualan nu aya patalina jeung kulawarga, paripolah pamajikan atawa pasangan hirup, mangsa-mangsa nalika ditaringgalkeun ku babaturan dalit atawa sobat-sobat, sarta rupa-rupa tarekah pikeun ngarojong parjuangan bangsa Palestina.
Salian ti kitu, dina platform musik digital Spotify, lagu-lagu SKRL nu diputer dipidangkeun geus meunang apresisi nu hade ti para penggemar. Buktina wae lagu nu judulna Sahabat Lama geus diputer (597 kali), Hypocrate (271 kali), Metamorfosa (260 kali), Kamu (241 kal), jeung Jadi Duda (231 kali).
Ieu cirining lagu-lagu SKRL memang geus nyantel dina ati balarea utamana fans fanatik musik rock, boh di Jawa Barat boh di provinsi sejenna utamana di Pulo Jawa. Komo di Kabuaten Subang sorangan mah geus jadi pacapangan masarakat. “Insya Allah SKRL bakal terus eksis. Piduana wae,” pungkas Bony. (SundaNews/Kin Sanubary)
Comments