Perkami  Gelar Seminar Parenting  Haratis Pikeun  Guru Jeung Siswa di Ciparay

SundaNews (10/12/024). Perkumpulan Alumni SMAN 4 Angkatan 1985 (Perkami 4.85) ngagelar seminar parenting sarta lomba ngawarnaan sacara gratis pikeun kolot, guru, jeung siswa TK Aisyiah di Kecamatan Ciparay, Salasa 10 Desember 2024. Acara nu digelar di Aula SMPN 1 Ciparay ieu ngangkat téma “Berbagi Ilmu dan Keceriaan dari Perkami  untuk Orang Tua, Guru, serta Siswa Taman Kanak-kanak”.

Acara ieu dihadiran ku para ahli, di antarana psikolog Dra. Eva Sadrina, Psi, sarta praktisi kasehatan Dr. Novi Kadarini, MM. Dina seminar ieu dibahas rupa-rupa topik penting saperti deteksi awal  gangguan perilaku barudak, tantangan parenting zaman kiwari, sarta strategi ngasuh nu cocog dina ngadukung tumbuh kembang anak.

Ketua panitia, Enriko, nyebutkeun yén kagiatan ieu mangrupa salah sahiji wujud kontribusi Perkami pikeun ngabentuk generasi nu cerdas sarta  miboga ahlak mulia. “Mugia kagiatan ieu tiasa janten stimulus pikeun sadaya pihak dina nyiapkeun lingkungan nu kondusif keur pendidikan barudak,” ceuk Enriko.

Salah sahiji panitia, Dra. Eli Nurlaeli, nyebutkeun yén kagiatan ieu minangka stimulus sarta ihtiar dina ngaropéa persepsi yén hiji generasi téh jadi tanggung jawab babarengan. Lain ngan ukur sakola jeung kolot wungkul, tapi ogé  sakabeh  unsur pikeun nyiptakeun iklim sosial anu leuwih hade. Kagiatan ieu  meunang pangrojong ti para kolot, guru, jeung komunitas lokal. (herdiana)