Ku: Ridhazia
MENTERI Pendidikan Tinggi, Sains, jeung Téknologi, Brian Yuliarto, ngritik budaya masarakat Indonesia anu resep nyebut jalma maké gelar akademik, saperti sebutan profesor.
Alumni ITB Bandung anu ogé nyepeng kalungguhan profesor — dilantik ku Présidén Prabowo Subianto jadi menteri dina 19 Pébruari 2025 — nétélakeun yén budaya nyapa atawa nyauran ku sebutan profesor saperti kitu, ceuk anjeunna, henteu kapanggih di nagara séjén.
Geus Jadi Budaya Dunya
Pamadegan Mendiktisaintek éta dianggap kurang aya dasarna lamun nyebut yén budaya nyauran “profesor” ngan ukur lumangsung di Indonesia.
Sabab, sacara sajarah, tradisi nyauran akademisi kampus ku sebutan profesor geus lila ngakar dina budaya jeung hirarki akademik di sakuliah dunya.
Dina dunya akademik, profesor mangrupa kalungguhan akademik pangluhurna pikeun dosén, nyaéta Guru Besar.
Hartina, profesor lain saukur gelar, tapi ogé lambang pangajén kana katekunan, kamampuh, jeung kaahlian akademik pangluhurna anu dipiboga ku tenaga pendidik di paguron luhur. Ieu mangrupa tradisi anu lumaku sacara universal.
Pikeun ngahontal éta kalungguhan ogé teu gampang. Jalanna panjang, kudu ngaliwatan rupa-rupa panalungtikan ilmiah jeung medalkeun publikasi akademik salila mangtaun-taun, malah aya nu nepi ka puluhan taun.
Lambang Pangajén
Di réa nagara anu miboga tradisi pendidikan luhur, nyebut gelar jeung kalungguhan akademik mangrupa salah sahiji wangun pangajén kana dedikasi intelektual saurang akademisi.
Dina sajarah kacatet yén gelar profesor mimiti diberlakeun di Inggris dina abad ka-16 ku Raja Henry VIII minangka kalungguhan resmi pikeun pangajar anu miboga kaahlian husus dina widang teologi, kadokteran, jeung hukum di lingkungan karajaan.
Sedengkeun tina asal kecapna, profesor asalna tina basa Latin profiteri, anu hartina pangakuan sacara kabuka ka jalma anu miboga kaahlian husus dina hiji widang anu jumlahna kawates.
Kakara 3 Persén
Jumlah profesor di paguron luhur Indonesia ayeuna kakara ngahontal kira-kira 2–3 persén tina sakabéh 350 rébu dosén.
Sedengkeun di nagara séjén, saperti Amérika Sarikat jeung Inggris, proporsi profesor geus ngahontal kisaran 10–15 persén tina total dosén. Di Malaysia sakitar 10 persén, sedengkeun Koréa Kidul geus nepi ka 20 persén.*
* Ridhazia, dosen senior Fidkom UIN Sunan Gunung Djati, kolumnis, paniten psikologi jeung pasualan komunikasi sosial pulitik, nganjrek di Bandung, Jawa Barat.
Comments